WILLEMSTAD — Siman pasa tabata nos atletanan bou di 15 aña i e biaha aki ta toka na nos atletanan riba 15 aña lo selebrá dia internashonal di atletismo.
Un total di 10 klup afiliá na e federashon di atletismo di Kòrsou a djòin otro pa un total di 60 atleta femenino i 88 atleta maskulino. Huntu ku e atletanan aki lo tin e 8 mihónan di kada kategoria ku a kompetí siman pasa.
Manera semper ta e kaso den atletismo lo tin karedanan di diferente distansia kuminsando for 100 meter te ku 3000 meter. Tambe lo tin e kareda di 100 i 110 meter ku opstákulo. Despues di hopi aña atletismo di Kòrsou lo tin mas 30 atleta kompitiendo riba e distansia di 100 meter. Miéntras ku riba e distansianan di 800, 1500 i 3000 meter nos lo tin mas ku 25 atleta kompitiendo. Rashid Rosalina ku ke pone un marka nobo riba e distansia di 800 meter tambe lo ta den kompetensia.
Den eventonan di salto haltu, largu i tripel e biaha aki nos lo tin diferente partisipante. Entre nan nos lo tin Nasya Ramirez di 14 aña i Jaden Bernabela di 16 aña ku kada un kaba di establesé un rèkert serka nos atletanan bou di 18 aña den respektivamente bula leu i bula haltu durante di Carifta Games na Grenada.
Pa loke ta trata nos lansadonan di bala di heru, sper i disko, e biaha aki lo tin un kantidat rekort di partisipante; kuminsando for di 14 aña miéntras ku esun di mas grandi lo tin 73 aña. Esaki ta un indikashon bon kla ku atletismo tá e deporte mama.
Entre e partisipantenan aki lo tin tambe presensia di e veterano Bob Esprit riba bala di heru. E veterano di Boneiru Eduard “Watty” Pourier tambe ta na Kòrsou sali kontra di nos atletanan master. E evento di pushamentu di bala di heru lo ta djabièrnè 07:00or den SDK. Lansamentu di sper i disko lo ta djasabra 14 di mei riba e fasilidat pariba di SDK di 2or pa 5or di atardi.
E kompetensia aki lo sirbi tambe komo preparashon di nos atletanan ku lo ta den Kampeonato MCB Atletismo Kòrsou ku lo tuma lugá dia 10 i 11 di yüni próksimo.
E evento lo ta djabièrnè 13 i djasabra 14 di mei den Stadion Ergilio Hato di SDK. Ámbos dia e kompetensia lo ranka sali 5.30or di atardi i lo terminá 9:30or di anochi. Na final di ámbos dia lo tin diferente kareda di relevo.
Entrada pa públiko en general lo ta dos (2) florin pa persona. Karchi lo ta optenibel na entrada di stadion Ergilio Hato.
Nos atletanan ta konta ku Kòrsou su apoyo.