Resumen: Seshon final den korte FDOK kontra IOC

WILLEMSTAD — Dia 20 i 21 di yanüari e último “hearing” tabata riba programa den korte na Lausanne.

Un delegashon di FDOK – sr. R. Bottse (hurista/konsehero), sr. R. Persaud (sekretario FDOK/konsehero) i sr. R. Francisca (presidente) tabata presente na Lausanne Suisa. Esaki tabata programá komo e seshon final, den e kaso kontra Komité Olímpiko Internashonal (KOI) pa rekonosé  e organisashon olímpiko di Kòrsou (FDOK).

Den e seshon di 20 di yanüari 2016 den korte,  e hues, a tende separadamente testigunan sr. Francisca i sr. Persaud ku a dura kasi 2 ora. Nan a kontesta preguntanan di wes i tambe di ámbos partido. E preguntanan tabata na franses i tradusí pa un traduktor na ingles. A kontestá na ingles i wes por sierto un  señora, tabata risibí tradukshon na franses.

Tur dos testigu a keda interogá intensivo i hopi severo. Tin ku bisa ku den e seshon aki por a ripará ku nos delegashon tabata hopi bon prepará mirando e manera kon tabata kontesta pregunta di IOC i wes .

Atardi e promé testigu di IOC a keda kuestioná. Diskushonnan hopi fuerte a tuma lugá entre partidonan. Despues di atendé e promé testigu di IOC, hues a pidi pa ámbos partido bai sinta na mesa i purba haña otro i yega na un akuerdo dentro di un siman.

Riba konseho di nos abogadonan a bai di akuerdo pa hasi esaki i a posponé e hearing. E siguiente dia 21 di yanüari,  delegashon di FDOK huntu ku nos abogadonan, a traha i a formalisá un proposishon ku a manda pa IOC.

E proposishon básikamente ta similar ku e akuerdo anterior di 14 di òktober 2014 ku FDOK a firma ku IOC,   pero ku IOC no a logra duna kontenido real na puntonan akordá.

Riba e mesun dia a manda e proposishon pa IOC i nan a primintí un kontesta dentro di 7 dia.

Den kaso ku IOC no kontestá o no firma, lo informá wes pa kontinuá ku e kaso.

Den kaso ku firma i IOC no kumpli ku e kontenido di akuerdo, lo informá wes pa kontinuá ku e kaso.

Entretantu, djárason 27 di yanüari direktiva di FDOK a tene un reunion informativo primeramente pa federashonnan miembro. Djaweps a tene un rueda di prensa pa informá komunidat i awor a saka un komunikado.

FDOK ta yama danki na komunidat en general, mundu di deporte en partikular ku ta bibando ku e kaso. Un danki spesial na Gobièrnu di Korsou ku ta kumpliendo kabalmente ku ehekushon di moshon unánime di parlamento  pa sostené FDOK den e lucha hustifiká pa Korsou por partisipá den kompetensia internashonal i tambe Weganan ku su propio bandera i himno, meskos ku Aruba i Ulanda.