WILLEMSTAD — Manera ya ta konosí nos selekshon nashonal di futsal a gana tur nan tres partidonan durante e promé buèlta di e torneo di futsal di CFU aya na Cuba i a kaba komo number 1 den nan pul. Ku e resultado aki nos selekshon a klasifiká pa e buèlta final di e torneo di futsal di CONCACAF ku lo tuma lugá na Costa Rica di 8 pa 15 di mei próksimo.
Nos selekshon ku e selekshon di Cuba ta e 2 ekipo di Karibe ku a klasifiká pa e siguiente buèlta di e torneo di futsal aki miéntras un di 3 ekipo tambe lo por klasifiká, si nan sali viktorioso di e partidonan di ‘play-off’ ku lo tuma luga na Costa Rica riba dianan 5 i 6 di mei.
Ayera nochi, nos selekshon a enfrentá e fuerte selekshon di Cuba aya den Sala Polivalente Kid Chocolate (Cuba) kaminda nos selekshon a kai vensí i a perde ku e skor di 5-0. Ku e resultado nos a keda komo e supkampion di e torneo aki.
Mester remarká ku ta promé bia ku nos selekshon di futsal a partisipá na e eliminatorio pa mundial Futsal di FIFA i nos ta sumamente kontentu i orguyoso ku e tremendo trabou ku nan a bin ta desplegá. Nos selekshon lo regresá Kòrsou fin di siman i mes ora trainingnan lo kontinuá den ful swing pa asina nos logra klasifiká i sigui pa e mundial di Futsal di FIFA ku lo tuma lugá na Colombia den luna di sèptèmber.
Nos selekshon nashonal di futsal ta konsistí di un grupo di 10 hungadó ku ta wòrdu dirigí pa Sr. Kenneth ‘Bob’ Bernabela ku ta e direktor tékniko di e selekshon aki i Sr. Jubinald Martis ku ta e asistente di e direktor tékniko.
Tambe ta biaha huntu ku e selekshon Sr. Luthson Reenis ku ta esun enkargá ku e materialnan di e selekshon, un fisioterapista kual ta Sr. Sander Schelling i e hefe di delegashon ku ta Sr. Alexander Molina, miembro di direktiva di FFK.
Nos selekshon ta konsistí di e siguiente hungadónan:
- Ashar Bernardus
- Gino Costina
- Shurwendel Roosje
- Everon Espacia
- Jarzinho Pieter
- Rudrick Pop
- Germaine Geerman
- Jean Pauletta
- Stallone Isenia
- Reginald Martina