WILLEMSTAD — Ayera 27 di ougùstùs Ruthsel Martina, presidente di klup di atletismo Trupial – Auto City a hasi entrega di e flayer i draaiboek di APC Run & walk 2105 na sr. Angelo Virginie bosero di Algemeen Pension Fonds – APC ku ta spònser mayó di e evento aki.
Ku esaki e komishon di preparashon ta indiká ku nan ta ful den swing pa realisá otro evento deportivo grandi aki na Kòrsou. E aña aki e kareda i kaminata lo tuma lugá dia 4 di òktober próksimo.
E promé kaminata di 10 km. habri, lo start pa 6 or di meinta i despues di sigui e kareda di 10 km. i e otro distansianan pa e kategoria mas chikitu. Tur evento lo start i kaba riba e lugá ta pone outo di Sentro Pro Arte, t/o e edifisio di APC na Schouburgweg.
Manera kada aña klup di atletismo Trupial – Auto City ta pone un òf mas atrakshon èkstra na e evento, pa 2015 klup Trupial – Auto City a habri porta pa dos organisashon ku ta traha pa nos kaminata djòin e kaminata for di kual nan por saka benefisio pa nan organisashon.
E promé organisashon ta Pro- Bista ku for di aña pasa a djòin nos kaminata ku hopi éksito. Pa 2015 nos a haña e organisashon Single Mother Success ku tambe lo djòin nos evento. Bunita di e union aki ta ku pa kada un di nos organisashon bai organisá un kaminata, aki nos a uni forsa i organisá 3 den 1, lokual lo benefisiá tur e 3 organisashonnan.
Tambe e aña aki nos lo stimulá grupo nan ku ta hasi ehersisio huntu bin kana na grupo. Duna bo grupo un nòmber òf kana komo empleado di un kompania pa partisipá na nos evento. Lo tin un premi èkstra pa e grupo ganadó. Un danki ta bai na gerensia di Algemeen Pension Fonds – APC pa un aña mas kere den nos organisashon Trupial – Auto City.
Tambe un danki na tur e otro sub-spònser ku ta duna un kontribushon hopi balioso na e evento. Pronto lo sali mas informashon di e evento aki i lo indiká ku dia i unda por inskribí i tuma T-shirt.