Kuerpo di arbitrahe pa partido kontra El Salvador

WILLEMSTAD — Manera ya ta konosí nos selekshon nashonal lo tin ku enfrentá El Salvador den e terser buèlta di e weganan pa eliminatorio pa mundial Rusia 2018. E promé partido lo tuma lugá aki na Kòrsou djabièrnè 4 di sèptèmber pa 7:05pm den Stadion Ergilio Hato (SDK) miéntras e segundo partido lo tuma lugá aya na El Salvador den ‘Estadio Cuscatlán’ djamars 8 sèptèmber próksimo 7:35pm.

Preparashonnan ta tumando lugá pa e weganan di e terser buèlta di e weganan di eliminatorio i e kuerpo di arbitrahe ku lo dirigí e 2 partidonan aki ya ta konosí. E kuerpo di arbitrahe ku lo dirigí e promé partido dia 4 di sèptèmber binidero entre nos selekshon nashonal i El Salvador ta lo siguiente: e rèfri prinsipal ta Sr. Valdin Legister (Jamaica), e 2 asistentenan di liña lo ta Sr. Ricardo Antonio Morgan (Jamaica) i Sr. Garnet Page (Jamaica). E 4to ofisial lo ta Sr. Kevin Morrison (Jamaica), e asesor di rèfrinan lo ta Sr. Clemory Francois (St.Vincent & the Grenadines) i e komisionado di e wega aki lo ta Sr. Hector de Jesus Cardenas (Mexico).

E kuerpo di arbitrahe ku lo dirigí e segundo partido dia 8 di sèptèmber binidero aya na San Salvador ta lo siguiente: e rèfri prinsipal ta Sr. Ricardo Montero Araya (Costa Rica), e 2 asistentenan di liña lo ta Sr. Warner Castro (Costa Rica) i Sr. Osvaldo Luna (Costa Rica). E 4to ofisial lo ta Sr. Hugo Cruz (Costa Rica), e asesor di rèfrinan lo ta Sr. Carlos Pastrana (Honduras) i e komisionado di e wega aki lo ta Sr. Ariel Alvarado (Panama).

Nos selekshon, manera nos a avisá anteriormente ta yega Kòrsou djaluna, 31 di ougùstùs pa kuminsá ku e entrenamentu nan pa e gran partido aki. Nos selekshon, manera tabata e kaso durante e 2 promé buèlta nan lo hospedá na Blue Bay Resort. E selekshon di Salvador a adelantá nan buelo i tambe lo yega Kòrsou djaluna 31 di ougùstùs i no djarason manera tabata plania. E selekshon di Salvador lo hospedá na Hotel Holiday Inn.

Karchinan ya ta na benta i e preisnan pa karchi pa e diferente sekshonnan ta lo siguiente:

  • VIP ta kosta Nafl. 500,- (inkluí konsumo); (maksimal 500 persona)
  • Bou di tribuna kubri ta Naf.100,- (maksimal 1000 persona)
  • Bou di tribuna kubri parti Festival Center ta Nafl.75,- (maksimal 1000 persona)
  • Tribuna no kubri ta Nafl.30,- te ku 31 di ougùstùs, promé di sèptèmber e karchinan lo bira Nafl.35,-. Den e sekshon aki mucha te ku 12 aña i 60+ ta paga Naf.20.- (maksimal 8000 persona)

Karchinan ta optenibel na FFK bou di ora di ofisina, na Pòmp di gasolin Sta Maria, Botika Mampuritu, 4th of July na Barber, Beep Beep Rio Canario, Mensing’s Caminada, na tur filial di C-Post N.V. i na Biep Tiew & More na Berg Altena.

Benta di suèter i shal ta kontinuá na FFK na balor di 35 i 25 florin. Un súplika ta bai na abo, komo e number 12 ku no tin bo suèter òf shal ainda pa kumpra esaki paso e ora 0 ta yegando!

Nos ta pidi tur fanátiko, e number 12, pa kumpra bo karchi trempan pa bin sostené i apoyá nos selekshon nashonal komo e number 12!

Nos selekshon i nos hungadónan ta konta kubo sosten masal den SDK djabièrnè 4 di sèptèmber pa 7:05pm!