PANAMA — Di 16 pa 22 di ougùstùs Studenten Sport Federatie Dutch Caribbean a biaha ku un delegashon di atletanan di Boneiru, i Kòrsou riba diferente ramo di deporte pa e di 15e weganan universitario ODUCC Games 2015 na Panama. E disiplina nan ta atletismo, karate, basket bal di Kòrsou i atletismo, karate i tènis di mesa for di Boneiru. E atletanan di Kòrsou miembro di klup di atletismo Trupial – Auto City a tuma e weganan aki hopi na serio i a bai por la goma pa e premio nan. Tabata Marelly Balentina ku riba e promé dia di atletismo a gana medaya di plata riba tira disco femenino. Marelly a sigui riba e di dos dia ganando oro riba tira sper.
Anthony Manuel no a keda tras i a bin gana medaya di plata riba tira sper maskulino. Nathaniel Obispu a bin sali 2 bia na di 4e lugá riba 200 i 400 m. Nèt kòrtiku pa e lugá riba e podium di honor. E atletanan aki a demostrá madures, kompetiendo ku vários atleta universitario di nos aria. Tin +/- 1200 atleta di tur e 10 ramo di deporte na e evento aki, loke ta demostrá e magnitut di e kompetensia nan. Un pabien ta bai na e atletanan aki ku un bia mas a saka kara di Kòrsou, atletismo, nan klup Trupial – Auto City i nan mayornan ku ta sostené nan all the way.
Direktiva di klup di atletismo Trupial – Auto City ta gradisí tur e spònsernan, personan ku a bishitá nos konsierto riba Freewinds djamars último. Esaki a hasi posibel pa nos por a realisá e biaha pa Panama. Un danki spesial ta bai na Freewinds, Ced Ride i Hersel & Friends ku a yuda nos pa un tremendo show. Nos ta kere si ku den futuro mester tin fondonan pa kubri gastu di atleta nan ku ta biaha den representashon di pais Kòrsou. E delegashon lo yaga djasabra 12:00 Kòrsou.