Liga MCB: Sithoc lo hunga promoshon i degradashon

WILLEMSTAD — E kampionato di futbòl promé divishon Liga MCB a kontinuá den wikènt tras di lomba ku partidonan den Stadion Antoine Maduro (SUBT). Riba djabièrnè tabata e ekipo di Victory Boys ku a enfrentá Jong Holland. Akinan tabata e ekipo di Jong Holland ku a logra tres punto, derotando Victory Boys ku skor di 2-1. Pa Jong Holland e golnan a keda anotá pa Samuel Matheus i Riddick Koeiman. Miéntras ku e úniko di Victory Boys a keda anotá pa Randal Winklaar.

Riba djasabra e kampionato a kontinuá ku dos partido. Den e promé partido tabata SUBT ku a enfrentá Jong Colombia. Akinan tabata SUBT ku a sali for di e porta grandi derotando Jong Colombia ku skor di 2-1. Pa SUBT e golnan a keda anotá pa Rayno Inesia i Jimenez de la Cruz. E gol di Jong Colombia tabata un outogol.

Den e di dos partido di djasabra tabata Scherpenheuvel ku a topa ku Hubentut Fortuna. Akinan tabata Hubentut Fortuna ku a logra e viktoria di 4-0 riba Scherpenheuvel. E golnan di Hubentut Fortuna a keda anotá pa Tyrone Maria, Luis Fruto Miranda i Ishuar Martina(2x)

E kampionato a kontinuá djaluna ku e partido entre UNDEBA i Sithoc. E partido aki a terminá na un empate ku ambos ekipo anotando dos gol. Pa UNDEBA e golnan a keda anotá pa Alejandro Araujo i Jurickson Jansen. Miéntras ku pa Sithoc e golnan a keda anotá pa Arthley Bernadina i Jason Inecia. Ku e resultado aki e ekipo di Sithoc lo tin ku hunga partidonan di promoshon i degradashon na final di temporada.