RUSIA — E selekshon Nashonal di Futbòl di Kòrsou lo enfrentá El Salvador den e 3 buèlta di e eliminatorio pa Mundial Rusia 2018. Esaki a keda determiná despues di e sorteo di FIFA na Rusia riba 25 di yüli ultimo.
E selekshon di Kòrsou ku na kabes Patrick Kluivert, apesar di a empatá ambos partido nan a eliminá Cuba den e di dos buèlta pa kontinuá den e eliminatorio pa Mundial 2018. Kontra Cuba e selekshon Nashonal di Kòrsou a empatá na sero gol na kas i na un gol na Cuba.
Den e di dos buèlta e selekshon di El Salvador a hunga kontra St. Kitts and Nevis. Akinan e selekshon Salvadoreño a empatá na 2 gol ku St. Kitts na St. Kitts, miéntras ku nan a gana e partido na kas ku skor di 4-1.
Histórikamente Kòrsou e tempu ey bou di bandera di Antia Hulandes a hunga na kuater okashon kontra El Salvador den e eliminatorionan pa Mundial. E ultimo biaha tabata na aña 1988. Akinan e selekshon di Kòrsou a pèrdè na tur kuater okashon. Por lo general Kòrsou a hunga na 17 okashon kontra El Salvador i tin un rèkert di dos gana, seis empatá i nuebe pèrdí.
Ainda e fecha ofisial den kue e selekshon di Kòrsou lo topa ku El Salvador no ta konosí. Tin menshon ta keda hasi di e fecha di 4 di sèptèmber pa e partido entre e dos ekiponan na Kòrsou, sin embargo esaki no ta konfirmá pa FIFA ainda.
Lo ke si ta sigur ta, ku si Kòrsou gana di El Salvador e selekshon di Kòrsou lo pasa pa e buèlta 4 ku ta e buèlta di grupo. Den kaso ku Kòrsou logra yega buèlta kuater, e selekshon di Kòrsou lo ta den grupo A huntu ku Mexico, Honduras i e ganadó di e partidonan entre Cananda i Belize.