WILLEMSTAD — E kampionato di futbòl promé divishon Liga MCB a kontinuá den wikènt tras di lomba ku partidonan den Stadion Ergilio Hato. Riba djabièrnè tabata e ekipo di Scherpenheuvel ku a topa ku Victory Boys. Akinan ambos ekipo a bai kas ku un punto despues ku e partido a finalisá ku un empate na 0 gol.
Riba djasabra e kampionato a kontinuá ku dos partido. Den e promé partido tabata Jong Holland ku a enfrentá e ekipo di Centro Dominguito. Akinan tabata Centro Dominguito ku a derota Jong Holland ku skor di 2-0. Pa Centro Dominguito ambos gol a keda anotá pa Norvianel Naar.
Den e di dos partido di djasabra tabata Centro Barber ku a enfrentá UNDEBA. Akinan tabata Centro Barber ku a logra e viktoria, ganando di UNDEBA ku skor di 3-1. Pa Centro Barber e golnan a keda anotá pa Ruwensley Girigorie, Zjurdiene Laken i Mirco Colina Jr. Pa UNDEBA e úniko gol a keda anotá pa Alejandro Araujo.
E kampionato a kontinuá djadumingu ku dos partido. Den e promé partido tabata Jong Colombia kontra Sithoc. Akinan tabata Sithoc ku a derota Jong Colombia ku skor di 2-1. Pa Sithoc e golnan a keda anotá pa Dudley Haddocks i Jason Inecia. E úniko di Jong Colombia a keda anotá pa Gildemar Fernando.
Den e di dos partido tabata Hubentut Fortuna ku a topa ku SUBT. Akinan tabata Hubentut Fortuna ku a logra e tres puntonan, derotando SUBT ku skor di 1-0. E gol di Hubentut Fortuna a keda anotá pa Luis Fruto Miranda.