Hensley Paulina di kuater di Oropa riba 100 meter U-23

ESTONIA — Pa un frakshon di sekònde Hensley Paulina ta keda sin haña medaya riba 100 meter den e kampionato Oropeo bou di 23 aña. Hensley a kore pa un tempu di 10,40 sekònde ku tabata bon pa di kuater lugá miéntras ku su rival franses Guy-Elphège Anouman a logra di tres lugá ku un tempu di 10,39 sekonde. E kareda a keda gana pa Giovanni Galbieri di Italia ku a kore un tempu di 10,33 sekònde.

Hensley a klasifka pa e final ku e di dos mihó tempu den semi-finalnan. Den semi-final e atleta di Kòrsou ku ta representando Hulanda a kore un tempu di 10,29 sekònde. Segun e atleta; “e kareda tabata un kareda fásil pero lastimamente mi hamstring no por a wanta mas”.

Problema ku hamstring tabata e motibu ku Hensley mester a kanselá su partisipashon despues di e promé buèlta klasifikatorio di 200 meter tambe. Den e promé buèlta klasifikaotrio di 200 meter Hensley a kore un tempu di 21,17 sekònde. Pero despues di e kareda aki e atleta a haña kram den su hamstring i a tuma e desishon pa no sigui ku su partisipashon den e evento.