Atletanan di Kòrsou den top 10 den kompetensia Tiglon

Willemstad — Atletanan Hayrich Juliana i Bas Casper di Crossfit 5 Triple 9 di Kòrsou a partisipá na e kompetensia di Crossfit TIGLON na Hulanda djadumingu ku a pasa dia 28 di yüni i a logra sali den e 10 mihónan. TIGLON ta un kompetensia entre e mihó atletanan i organisashonnan di Crossfit na Hulanda. Pa promé biaha Kòrsou tambe ta partisipá na e kompetensia ku dos atleta. Esaki tabata e promé representashon di atletanan lokal, ku ta hasi Crossfit na Kòrsou, na un kompetensia den eksterior. A sobra 2 dia di kompetensia mas na kual e atletanan di Kòrsou por kompetí, i na final di aña lo saka De Fitste van Nederland i De Fitste Box (sinónimo na gym) van Nederland.

E aña aki TIGLON ta konsistí di 3 dia di kompetensia i promé ku kada kompetensia e atletanan mester kualifiká dor di hasi e diferente WODsnan. Kada WOD, ku ta un seri di ehersisio, por konsistí di hisa peso (weightlifting), gemnastik (tùrnen), forsa i kondishon (Strength & conditioning). E 20 mihónan di kada kualifikashon ta sigui pa e dianan di kompetensia.

Na promé lugá, Crossfit 5 Triple 9 ta orguyoso ku tur 2 atleta, di entre 176 persona a kualifiká pa e promé dia di kompetensia dor di sali den tòp 20 i nan ta mas orguyoso ainda ku durante e dia di kompetensia mes tur 2 a sali den tòp 10. Hayrich Juliana a sali na di shete(7) lugá i Bas Caspers na di nuebe (9) lugá. Ámbos su prestashon tabata sumamente bon si tene na kuenta ku nan ta kompetí ku e ganadó di De ‘Fitste van Nederland’ di Hulanda i otro atletanan ku a partisipá na e kompetensia Crossfit Regionals entre diferente pais di Oropa.

Na diferente parti di mundu tin kompetensianan di Crossfit tantu riba nivel lokal, regional komo internashonal. Crossfit ta hañando fama rònt mundu i ta mihó konosí komo “The sport of fitness”; via un seri di ehersisio ta tèst bo aptitut òf kapasidat a base di resistensia, stamina, forsa, fleksibilidat, vigor, spit, koordinashon, agilidat, balansa i presishon. Atletanan di Crossfit ta train pa por ehekutá diferente ehersisio na un nivel físiko hopi kompetitivo. Ku otro palabra, nan speshalisashon ta amplio, pa por hisa kosnan pisá, pa por demostrá stámina i koordinashon den diferente movementu, manera landa, kore, karga i hisa bo propio kurpa, ets.

Crossfit 5 Triple 9 tin solamente 1 aña i mei di eksistensia. E box ta afiliá na e organisashon mama i ta spera di por train hopi atleta mas di Kòrsou pa por kompetí riba nivel internashonal. E box ta situá den kurá di St. Jozef VSBO na Otrobanda i tin mas ku dosshen miembro i tres coach ku ta sertifiká den e diferente áreanan. Por bishitá e FB página i website pa sigui e desaroyo i informashonnan tokante Crossfit 5 triple 9.