WILLEMSTAD — Cpost International (Cpost) ta uni na e keintura di nos ta #12 na momentu ku nos kompania di pòst nashonal a firma un akuerdo ku Federashon di Futbòl Kòrsou (FFK). Pueblo kompletu ta kla pa apoyá nos selekshon nashonal dia 10 di yüni próksimo na momentu ku Kòrsou enfrentá Cuba pa 8‘or di anochi den Stadion Ergilio Hato. E akuerdo ta hasi posibel pa Cpost bende karchi di entrada pa e enkuentro aki no únikamente na e diferente ofisinanan di Cpost pero tambe atraves di e webportal di Cpost, kual ta www.righttothedoor.com. Esaki ta e promé paso pa nos Federashon di futbòl lokal, FFK dal un paso inovativo ku ta pas den e demanda di e era moderno riba tereno di benta di karchi via Internèt.
Cpost ta rekonosé ku tempu ta balioso i ku nos tur ke tin akseso na kosnan na un manera mas fásil. P’esei Cpost ta ofresé e posibilidat pa hasi e.o. kompra di karchi pa e partido importante aki posibel na tur su lokalidatnan kual nan ta Punda, Groot Kwatier, Otrobanda, WTC i Santa Rosa. Ademas di nos sentronan di servisio persona nan interesá por sinta trankil na kas, ofisina òf na laman i bai riba www.righttothedoor.com pa kumpra su karchi i Cpost lo entrega esaki kaminda abo ta deseá. Si akaso bo no ta miembro ainda di righttothedoor.com, esaki ta un bon oportunidat pa bo registrá i hasi uso di e servisio aki.
Benta di karchi online a bira un desaroyo mundial. Teknologia ta hasi posibel pa e fanátiko di futbòl apoderá di su karchi na un manera fásil i kómodo. Kòrsou no por keda atras, p’esei FFK ta dal e promé paso aki en konekshon ku e kompromiso ku nos selekshon nashonal tin kontra di Cuba.
Karchinan ya ta na benta i e preisnan pa karchi pa e diferente sekshonnan ta lo siguiente:
- VIP ta kosta Naf. 250,- (inkluso konsumo);
- Bou di tribuna kubri ta Naf. 55,-
- Bou di tribuna kubri parti Festival Center ta Naf. 40,-
- Tribuna no kubri ta Naf. 30,-
- Den e sekshon di tribuna no kubri mucha te ku 12 aña i 60+ ta paga Naf. 15.-
Un i tur ta keda enkurashá pa kumpra nan karchi i nan blusanan trempan debí ku ta spera un yeno kompleto pa e partido aki. Ya e promé zending di blusanan ta kabando i pa komienso di yüni e segundo zending lo yega pa asina tur fanátiko por tin nan blusa pa bin apoyá nos selekshon komo e number 12!
Ku e aliansa aki FFK huntu ku Cpost a hasié mas fásil pa abo tin bo karchi den bo man, pa huntu nos ta e hungadó #12. Bin sostené nos selekshon riba tereno rumbo pa Rusia ku nos viktoria riba Cuba.