WILLEMSTAD — Djasabra 23 di mei binidero ta dia ku CONCACAF a nombra dia di futbòl pa dama. Federashon di Futbòl Kòrsou komo miembro di CONCACAF tambe lo tuma parti na inisiativa di CONCACAF aki dor di organisá un torneo di 5 kontra 5 pa mucha muhénan di kategoria U-15 (bou di 15 aña) i pa mucha muhénan di 16 aña bai ariba.
E biaha aki ta e promé bia ku CONCACAF lo organisá e dia di futbòl pa dama aki i ta e intenshon pa esaki tuma lugá tur aña di nobo. 27 miembro di CONCACAF lo partisipá na e dia pa futbòl di dama aki i tur pais lo organisá aktividatnan en konekshon ku e dia aki.
CONCACAF ta spera ku e dia pa futbòl di dama aki lo yuda promové futbòl pa dama i ku e lo enkurashá mas mucha i hende muhénan pa partisipá na e deporte aki i krea un laso entre tur e organisashon nan partisipante.
FFK a traha un plan di 4 aña pa promové futbòl pa dama i den kuadro di e implementashon di e plan aki FFK ta organisando diferente aktividatnan pa futbòl hubenil pa dama pa pone un base amplio den futbòl pa dama aki na Kòrsou. Pareu ku esei, ta reklutando damanan talentoso pa forma selekshon nan ku lo partisipá na torneonan internashonal. Aktualmente e selekshon di dama di kategoria U-20 (bou di 20 aña) ta den preparashon pa bai representá nos den e Kampionato di U-20 pa dama di ‘Caribbean Football Union’ (CFU).
E torneo di 5 kontra 5 lo tuma lugá riba tereno di FFK (U-15) i den stadion di SUBT (16+). Ámbos torneo lo kuminsá 9or di mainta. FFK lo sòru pa e transporte di e mucha muhénan di e diferente skolnan ku a inskribí pa partisipá ku e ekiponan ku nan mes a forma.
Pa mas informashon di e aktividatnan ku FFK lo organisá por bishita nos site; www.ffk.cw i ‘like’ nos página di Facebook; Federashon Futbòl Kòrsou i asina keda na altura di desaroyo pa loke ta trata futbòl pa dama. Pa informashon di futbòl di dama spesífiko por bishita e página di Facebook; Live Your Goals Curaçao.
FFK kier a invitá hinter e pueblo di Kòrsou pa bin presensia e dia aki. Sali un ratu ku bo famia i bin disfrutá di e dia di futbòl pa dama aki i mira kiko tur nos dama nan tin aden.