ALMERE — Dilanti un stadion yen ku mas di 2400 fanátiko e selekshon Nashonal di Kòrsou a derota Sürnam. Tabata ayera den stadion di Almere City FC ku e selekshon di Kòrsou a finalisá nan kampamentu di entrenamentu ku un partido di fogeo.
E selekshon di Kòrsou a kue e bentaha trempan den e promé mitar ku un tiru di distansia di Vidarrell Merencia. E selekshon di Sürnam ta empatá e partido na un djis algu promé ku final di e promé mitar.
Den e di dos mitar tabata Prince Rajcomar ku ta manda e selekshon di Kòrsou ariba bek. No muchu despues, Jason Wall ta amplia e bentaha ku un kabesaso riba un kòrner kobra pa Germaine Agustien.
No faltando muchu pa e partido finalisá Sürnam ta anotá nan di dos gol pa kòrta e bentaha. Apersar di esaki e selekshon di Kòrsou ta wanta i ta logra e viktoria di 3-2 riba Sürnam.
Segun Patrick Kluivert, “e partido tabata un bon entrenamentu pa ambos selekshon.” Pa loke ta trata e selekshon di Kòrsou, Kluivert a bisa ku nan lo hunga un partido di fogeo mas riba 5 di yüni na Kòrsou pero ainda e kontrinkante no ta konosí.
Dia 10 di yüni pa 8’or di anochi Kòrsou lo enfrentá Cuba den Stadion Ergilio Hato (SDK) miéntras 14 di yüni 4or di atardi Cuba lo enfrentá Kòrsou un bia mas na Havana, Cuba.
Grabashon di e partido