Churandy Martina i Hensley Paulina ku triunfo den wikènt

REINO UNI/HULANDA — Den wikènt tras di lomba Churandy Martina a partisipá ku éksito den e Great City Games Manchester 2015. Akinan e atleta yu di Kòrsou a partisipá den e evento di 150 meter i a logra un triunfo ku un tempu di 15.21 sekònde. Churandy a kuminsá e kareda na ultimo puesto pero a logra bin bek den e ultimo parti di e kareda pa bai ku e viktoria. Den e evento aki Churandy a kore kontra Danny Talbot di Reino Uni ku a finalisá na di dos lugá ku un tempu di 15.30 sekònde. Tambe James Ellington di Reino Uni ku a finalisá na di tres lugá ku un tempu di 15.37 sekònde. Di Merka tabata Curtis Mitchell ku no a logra finalisá a kareda.

Den otro evento di atletismo na Hulanda, tabata Hensley Paulina ku tambe a logra un triunfo den e kareda di Ter Specke Bokaal na Lisse. Hensley tambe a partisipá den e evento di 150 meter i a finalisá na promé puesto ku un tempu di 15.64 sekònde.

Kareda di Churandy Martina na Great City Games 2015