MERKA — Floyd Mayweather a kambia di idea, ta parse ku Mayweather ke traha un tiki sèn mas promé ku e retirá. Despues ku bòksdó a duna di konosé despues di e pelea di djasabra ku na sèptèmber lo e bringa su ultimo pelea, ayera e la manda un mensahe pa ESPN bisando ku e ta habri pa un revancha kontra Manny Pacquiao. Esaki klaro ku lo ta otro aña despues ku Manny rekuperá di e operashon ku lo e tin ku hasi na su skouder.
“Lo mi bringa ku ne aki un aña, despues di su operashon,” Mayweather a skirbi.
Ambos bòksdó ta enfrentando demandanan despues di e pelea di djasabra. Pa Manny, banda di e echo ku e lo por risibí sanshon di e Komishon di Atlétiko di Neveda, awor ta fanátikonan ta demandando e bòksdó. E fanátikonan ta buskando un rekompensa di 5 mion dòler pa motibu ku Pacquiao no a divulgá e leshon na su skouder promé ku e pelea.
Di otro banda Mayweather ta keda demanda dor di su èks-partner i mama di su tres yunan, Josie Harris pa 20 mion dòler. Esaki pa motibu ku segun Harris, Mayweather a gaña i difamá Harris den un entrevista promé ku e pelea.
Ainda no ta konosí kontra ken Mayweather lo bringa na sèptèmber próksimo. Segun Amir Khan, e la papia ku e ekipo di Mayweather despues di e pelea di djasabra i e ta bisa ku nan ta interesá den un pelea ku ne. Sin embargo, Khan a duna di konosé ku e no por bringa na sèptèmber próksimo ya komo ku e ta den ayuno pa motibu di Ramadan.