Gobièrnu di Kòrsou ta finansiá yerba artifisial nobo pa Stadion Ergilio Hato

WILLEMSTAD — Stadion Ergilio Hato (SDK) ta bai haña un renobashon di e vèlt di futbòl kompleto, den sentido ku yerba artifisial nobo lo keda poné riba henter e vèlt. Gobièrnu di Kòrsou, enkabesá pa nos Promé Minister, sr. Ivar Asjes, via di e fondonan pa invertí den fasilidatnan deportivo ku Reda Sosial ta manehá, ta bai realisá esaki den kooperashon ku e Federashon di Futbòl Kòrsou i Fundashon Fasilidatnan Deportivo Kòrsou.

Segun planifikashon, aki algun siman nos deportistanan i hóbennan por praktiká nan deporte preferí riba un tereno totalmente renobá ku yerba nobo. Ku e desaroyo positivo aki, Gobièrnu ta demostrá un biaha mas ku ta trahando duru pa engrandesé deporte na Kòrsou.

Ta premirá ku e vèlt di futbòl renobá lo ta kompletamente kla promé ku e wega di nos selekshon Nashonal di futbòl kontra Cuba na yüni awor. Promé Minister Asjes ta sumamente kontentu ku kosnan ta kanando den un bon direkshon pa nos Pueblo masalmente bin stadion i animá nos selekshon Nashonal di futbòl riba un tereno di yerba nòbs nòbs ku ta kumpli ku reglanan di FIFA.