WILLEMSTAD — E kampionato di futbòl promé divishon Liga MCB a kontinuá den wikènt tras di lomba ku partidonan na Stadion Antoine Maduro i na Stadion Ergilio Hato. Riba djabièrnè tabata e ekipo di Hubentud Fortuna ku a enfrentá Victory Boys den Stadion Antione Maduro. Akinan tabata Victory Boys ku a logra bai ku e viktoria derotando Hubentud Fortuna ku skor di 2-0. Pa Victory Boys e golnan a keda anotá pa Randel Winklaar i Jhudamier Marchena.
Riba djasabra tabata tin dos partido den Stadion Ergilio Hato. Den e promé partido tabata Centro Barber ku a derota Jong Colombia ku skor di 4-1. Pa Centro Barber e golnan a keda anotá pa; Geryon Alberto (2x), Christopher Isenia i Jurensley Martina. Miéntras ku e úniko di Jong Colombia a keda anotá pa Kendrith Poulino
Den e di dos partido di djasabra tabata e ekipo di SUBT ku a enfrentá Centro Dominguito. Akinan tabata Centro Dominguito ku a sali di e porta grandi derotando SUBT ku skor di 3-0. Pa Dominguito e golnan a keda anotá pa Norvianel Naar (2x) i Shaquelle Clements.
Riba djadumingu tabata Jong Holland ku a enfrentá Scherpenheuvel den e úniko partido pa djadumingu. Akinan Jong Holland ku a bai kas ku e tres puntonan despues di a derota Scherpenheuvel ku skor di 2-1. Pa Jong Holland e golnan a keda anotá pa Nathan Martina i Kemoy Reid, miéntras ku pa Scherpenheuvel e úniko gol a keda anotá pa Naigel Valorian.
Awe djaluna Liga MCB ta kontinuá ora ku UNDEBA topa ku e ekipo di Sithoc den Stadion Ergilio Hato.