PRAAG — Den wikènt tras di lomba tabata tin e kampionato Oropeo di Atletismo Indoor na Praag, Republika Cheka. Pa Hulanda tabata tin tres atleta di Kòrsou ku a klasifiká pa e kompetensia. E atletanan tabata Brian Mariano riba 60 meter, Liemarvin Bonevacia i Terrence Agard riba 400 meter.
Tabata Liemarvin ku Terrence Agard ku a mira akshon promé den e kompetensia riba djabièrnè. Ambos a kore den e buèlta klasifikatorio di 400 meter sin por logra klasifiká pa e siguiente buèltanan. Liemarvin a sali na di tres lugá ku un tempu di 47.62 sekònde den su seri, miéntras ku Terrence Agard a sali na di kuater lugá ku un tempu di 47.56 sekònde den su seri. Pa a kontinuá e atleta mester a finalisá su kareda den e promé dosnan of optené e mihó seis tempunan den e atletanan ku no a finalisá den e top dosnan. Despues di e kareda Liemarvin a bisa ku e la sali muchu poko poko i e mester a sali muchu mas lihé.
Brian Mariano si a logra yega semifinal den 60 meter pero akinan no ta logra pasa pa final. Brian a yega na di kuater lugá den su seri koriendo un tempu di 6.64 sekònde.