Breve Deporte Awe #1-028

  • Riba e promé dia ku e ekipo kompletu di Atlanta Braves a kuminsá ku nan praktikanan, Andrelton Simmons a aserka e manager di e ekipo Fredi Gonzalez pa informá ku e ta sintiendo un tiki doló den su muskulonan di barika. Segun Simmons, e la kuminsá sinti e doló for di dos siman pasa durante un praktiká di bateo. Despues e doló a bin bek algun dia pasa ora Andrelton a bai kontinuá ku su preparashonnan di pre-temporada. E ekipo di Atlanta mes ora a prohibí Andrelton di bati, kore i tira. E úniko kos ku e ekipo a laga Andrelton hasi tabata fildia. Segun Andrelton, e ta spera ku pa otro siman e ta haña lus bèrdè pa praktiká ku e ekipo sin restrikshon.
  • E ekipo di Milwaukee Brewers a yega na un akuerdo di dos aña pa 13 mion dòler ku e relevista Francisco Rodriguez. E ekipo di Miami Marlins tambe tabata interesá den e pelotero, pero e ekipo a ofresé e picher 10 mion dòler pa dos aña. Rodriguez temporada pasa ku e ekipo di Milwaukee Brewers a salba 44 partido ku un efektividat di 3.04 den 69 partido.
  • Toronto Blue Jays a yega na un akuerdo di Liga Menor ku invitashon pa Spring Training ku picher Johan Santana. Temporada pasa e pelotero di 35 aña e purba di hasi un comeback den Liga Grandi ku Baltimore Orioles pero no a logra esaki despues di a leshoná i mester a pèrdè e restu di e temporada. Santana a picha den algun partido di e Liga Invernal di Beisbòl na Venezuela. New York Yankees i San Diego Padres tambe tabata tin bista riba Santana.