Centro Barber kontra Scherpenheuvel den promé partido di Liga MCB

WILLEMSTAD — Djadumingu, promé di mart benidero Liga MCB Promé Divishon ta bai ranka sali den gran forma. Tur kos ta kla pa Centro Barber e ekipo kampion di Liga MCB Promé Divishon 2014 enfrentá Scherpenheuvel e ekipo kampion di Liga MCB Segundo Divishon.

E tremendo partido aki lo kuminsá 6’or di atardi i lo tuma lugá den Stadion Antoine Maduro (SUBT). Porta nan lo habri for di 3’or di atardi i pa 4’or nos lo tin un wega di dama entre SUBT i Willemstad.

Animashon pa e gran apertura aki ta na enkargo di e banda musikal DREAMS i direktamente for di Aruba, Ata Nirooo, Janiro Eisden lo tei ku su ‘Bon Vibe’ pa entretené un i tur. Dreams i Janiro lo kuminsá animá for di 5’or i durante pousa tambe nan lo entretené e públiko ku nan bon músika.

Liga MCB Promé Divishon 2015 ta wòrdu dediká na e siguiente baluartenan: Romualdo ‘Shon Ma’ Gomez, Ronald ‘Pong’ Martel, Alouisio ‘Jopi’ Rojer, Engelbrecht Schotborgh i Ronaldo Da Sousa ku hasi a hopi pa e deporte rei futbòl.

Entrada pa e promé wega di Liga MCB Promé divishon ta Fl.10 pa hende grandi i fl.5 pa mucha te ku 12 aña i 60+. Karchinan ta optenibel djadumingu promé di mart for di 3’or na Stadion Antoine Maduro. Karchinan adelantá ta optenibel na FFK bou di ora di ofisina i serka e 2 ekiponan ku lo mira akshon riba e dia aki esta Centro Barber i Scherpenheuvel.

FFK i MCB ta invitá hinter e pueblo di Kòrsou pa bin presensia e gran apertura di Liga MCB Promé Divishon. Bin apoyá i sostené bo ekipo preferí, disfrutá di un dushi ambiente i mas ku klaro presensia tremendo partidonan di futbòl.