- Banda di e ekiponan di Liga Grandi ku a mustra interes den Andruw Jones awor tin sigur un ekipo pafó di Merka ku tambe ta interesá den e pelotero. Segun informashonnan, tin un ekipo di e Liga di Beisbòl Profeshonal Mehikano ku a pidi permit pa negosiá ku e pelotero. Andruw lo biaha otro siman pa Hapon kaminda lo e uni huntu ku e selekshon di Tur-Strea oropeo pa hunga dos partido di ekshibishon kontra e selekshon di Hapon.
- E pelotero di Los Angeles Angels, Josh Hamilton tabata tin un reunion ku ofisialnan di Major League Baseball riba un asuntu disiplinario. Gerente General di e ekipo Jerry Dipoto a konfirmá ku Hamilton ta na New York pero no kier a duna informashon riba e motibu. Segun informashonnan, Hamilton ku na aña 2004 te ku 2006 a keda suspendé for di beisbòl pa abusu di kokaina i alcohol a haña un rekaida. Aparentemente Hamilton a konfesá di tabata envolví den uso eksesivo di kokaina algun luna pasa. E ekipo debe Hamilton 23 mion dòler e temporada aki i un otro 60 mion pa temporada 2016 i 2017. Sin embargo, e pelotero no ta keda paga pa tempu pèrdí pa motibu di suspenshon.
- E ekipo di Baltimore Orioles a anunsiá ku nan a yega na un akuerdo di un aña pa 2,4 mion dòler ku infielder Everth Cabrera. Parti di e dil ta inkluí un opshon di Liga Menor pa e pelotero, segun e ekipo Cabrera lo haña tur oportunidat pa keda ariba ku e ekipo despues di Spring Training. Temporada pasa ku San Diego Padres e pelotero tabata tin un promedio di .232 ku 3 honron i 20 kareda empuha.
- Prospekto kubano, Yoan Moncada a yega ayera na e kampamentu di entrenamentu di Boston Red Sox. Akinan e pelotero lo tin ku hasi e promé parti di su eksámen fisko. Mas den fin di siman e pelotero lo biaha pa Boston kaminda lo e kompletá e eksámen físiko i su kontrakt ku e ekipo.
- Mariano Rivera ta bek ku e ekipo di New York Yankees durante di e pre-temporada pero a biaha aki komo instruktor di picheo. Mariano tin plania pa keda e próksimo 10 dianan na e kampamentu di entrenamentu di Yankees.