WILLEMSTAD – Despues di a kuminsá e kampionato di atletismo na Zurich, Suiza, ni Liemarvin Bonevacia tampoko Churandy Martina no a logra yega final. Ambos a partisipá ayera den e semifinal di nan respektivo evento sin éksito.
Liemarvin a bai atras den su tempu riba 400m kompará ku e dia anterior. Den su seri Liemarvin a yega na di sinku lugá ku un tempu di 46.38 sekònde. Liemarvin lo tuma un pause i ku tur probabilidat lo mira akshon atrobe den wikènt ora tin e relevo 4x400m.
Meskos ku Liemarvin, Churandy tambe a bai atras den su tempu. Pa Churandy tabata aun mes desepshonante teniendo na kuenta ku e la kore un tempu di 10.34 sekònde i tabata tin mester solamente un tempu bou di 10.30 sekònde pa pasa pa e final. Den su kareda riba 100m Churandy e finalisá na di kuater lugá ku e tempu ya menshoná di 10.34 sekònde. Segun Churandy, e la slip den e salida i no por a rekuperá di esei, pero ta kosnan ku por pasa. Churandy lo partisipá den dos evento mes, esta esun di 200m ku ta kuminsá awe i tambe relevo 4x100m den wikent proksimo.
Semifinal 400m di Liemarvin Bonevacia
Semifinal 100m di Churandy Martina