Floyd “Money” Mayweather lo enfrentá Marcos “El Chino” Maidana den su próksimo pelea

LAS VEGAS, NEVADA – Mayweather Promotions huntu ku Golden Boy Promotions a anunsiá e siguiente pelea di e bòksdó Floyd “Money” Mayweather den un komunikado.

Segun e komunikado, despues di siman nan di spekulashon, inkluyendo reakshon di fanátikonan riba e diferente plataformanan di media sosial, e aktual Kampion di WBC peso welter, Floyd “Money” Mayweather lo bringa kontra e aktual Kampion WBA peso welter, Marcos “El Chino” Maidana riba djasabra 3 di mei próksimo.

E pelea lo ta un pelea programa pa 12 asalto, kaminda tantu e faha di WBC peso welter di Mayweather komo esun di WBA peso welter di Maidana lo ta den wega.

Den 2013, Mayweather a gana di Robert Guerrero i Canelo Alvarez pa pone su rèkert na 45 gana for di kua 26 knockout i 0 pèrdí. Segun Mayweather, “e ultimo pelea di Maidana mesora a hala su atenshon. Maidana ta un boksdo hopi bon ku ta trese e peliger di knockout den ring.”

E Argentino, Maidana tin un rèkert di 35 gana for di kua 31 knockout i 3 pelea pèrdí. Den su ultimo pelea, Maidana a sorprendé Adrien Broner mandando  e bòksdó aki suela na dos okashon i asina gana e pelea pa desishon unánime. Segun Maidana, “e ta hopi kontentu ku e oportunidat pa bringa kontra Floyd Mayweather paso esei ta dune e oportunidat di mustra mundu ku e ta e mihó peso welter den e divishon.”